بـــــــهيــه

موضوع: بـــــــهيــه الأحد ديسمبر 27, 2009 5:02 pm

بهية

يسبق كلامنا سلامنا يطوف ع السامعين معنا

عصفور محندق يزقزق كلام موزون و له معنى

عن ارض سمرا و قمرة

و ضفه و نهر و مراكب

و رفاق مسيرة عسيرة

و صورة حشد

و مواكب

ف عيون صبية بهية

عليها الكلمة و المعنى

************

مصر يا امّة يا بهية

يام طرحة و جلابية

الزمن شاب و انتي شابة

هو رايح و انتي جاية

جايه فوق الصعب ماشية

فات عليكي ليل و مية (100)

و احتمالك هو هو

و ابتسامتك هي هي

تضحكي للصبح يصبح

بعد ليلة و مغربية

تطلع الشمس تلاقيكي

معجبانية و صبية

يا بهية

*****************

الليل جزاير جزاير

يمد البحر يفنيها

و الفجر شعلة ح تعلا

و عمر الموج ما يطويها

و الشط باين مداين

عليها الشمس طوافة

ايدك في ايدنا

ساعدنا

دي مهما الموجة تتعافى

بالعزم ساعة جماعة

و بالأنصاف نخطيها

مصر يا امّة يا سفينة

مهما كان البحر عاتي

فلاحينيك ملاحينيك

يزعقوا للريح يواتي

اللي ع الدفة صنايعي

و اللي ع المجداف زناتي

و اللي فوق الصاري كاشف

كل ماضي و كل آتي

عقدتين و التالته تابتة

تركبي الموجة العفية

توصلي بر السلامة

معجبانية و صبية.. يا بهية

**********************

و يعود كلامنا في سلامنا يطوف ع الصحبة حلواني

عصفور محني يغني

على الأفراح ومن تاني

يرمي الغناوي تقاوي

تبوس الأرض

تتحنى

تفرح

و تطرح

و تسرح

و ترجع تاني تتغنى

اللي بنى مصر كان في الأصل حلواني